အထူးကျွမ်းကျင်လုပ်သားနိုင်ငံခြားသားအဖြစ် အလုပ်လုပ်သော မိနိုစံသည် မီးဖိုချောင်တွင် ရာမန်ခေါက်ဆွဲ ချက်ပြုတ်ခြင်းကို အဓိကထား၍ ဧည့်သည်ဝန်ဆောင်မှု အပါအဝင် ဆိုင်တွင်းလုပ်ငန်းပိုင်း အားလုံးကို တာဝန်ယူလျက် ရှိပါသည်။

မိမိတို့ဆိုင်နှင့် မိနိုစံ၏ ပတ်သက်မှုသည် ၂၀၁၇ ခုနှစ်တွင် စတင်ခဲ့ပါသည်။ ထိုအချိန်က မိနိုစံကို ရှန်ဟိုင်းမြို့တွင် ဖွင့်လှစ်ထားသော အီချိလျူးအန်း စားသောက်ဆိုင်ခွဲ၏ စားဖိုမှူးအဖြစ် ဆာ့ပိုရိုမြို့ရှိ ဆိုင်တွင် အလုပ်သင် လုပ်စေခဲ့ပါသည်။ ရှန်ဟိုင်းမြို့မှ ဆိုင်ကို ၂၀၁၉ ခုနှစ်တွင် ပိတ်ခဲ့ရသော်လည်း ပြည်တွင်းမှ ဝန်ထမ်းမလုံလောက်မှုကို ဖြေရှင်းရန် ရည်ရွယ်၍ ဝန်ထမ်းခေါ်ယူမှုမျိုးစုံကို ပြုလုပ်နေစဉ် ဆိုင်မန်နေဂျာမှ မိနိုစံကို လှမ်းခေါ်၍ ပြည်တွင်းမှ ဆိုင်တွင် အလုပ်လုပ်စေခဲ့ပါသည်။ အစပိုင်းတွင် ဆာ့ပိုရိုမြို့တွင်းမှ ဂျပန်စာကျောင်းသို့ သွားလျက်ဖြင့် ကျောင်းသားအချိန်ပိုင်းဝန်ထမ်းအဖြစ် ခန့်အပ်ခံရပြီး ၂၀၂၂ ခုနှစ် ဇူလိုင်လမှစ၍ အထူးကျွမ်းကျင်လုပ်သားနိုင်ငံခြားသားအဖြစ် စတင် အလုပ် လုပ်ခဲ့ပါသည်။

မိနိုစံ၏ အလုပ်လုပ်ပုံသည် အလွန်ပင် လေးနက်တည်ကြည်ပြီး သန့်ရှင်းရေး လုပ်ရာတွင်လည်း အခြားသူများထက် အသေးစိတ် ဂရုတစိုက် ပြုလုပ်တတ်သော အရည်အချင်းရှိဝန်ထမ်း ဖြစ်ပါသည်။ စားဖိုမှူးအတွေ့အကြုံ ရှိသူလည်း ဖြစ်ပြီး ထိုကျွမ်းကျင်မှုနှင့် ထူးခြားသောအမြင်ရှိမှုကို အစွမ်းကုန် ပြသနိုင်ရန် လုပ်ငန်းပိုင်းတွင် စဉ်းစားလုပ်ကိုင်လျက် ရှိပါသည်။ ထို့အပြင် မီနူးအသစ် တီထွင်မှုအခွင့်အရေးကို ဖန်တီးပြီး စိန်ခေါ်လုပ်ကိုင်စေခဲ့သော ရလဒ်အနေဖြင့် မိနိုစံမှ အသစ် တီထွင်လိုက်သော ရာမန်ခေါက်ဆွဲ "မီးတောက်အစပ် (ခါလာ့ဘိအန်း)" ကို ဆိုင်တင် ရောင်းချနိုင်ခဲ့ပါသည်။ ထိုရာမန်ခေါက်ဆွဲသည် ပဲငပိကို အခြေခံ၍ တရုတ်ငရုတ်ကောင်းနှင့် သစ်ကြပိုးခေါက် စသည့် ဟင်းခတ်အမွှေးအကြိုင်များ အသုံးပြု၍ ဂျပန်နှင့်ထိုင်ဝမ်အရသာကို ပေါင်းစပ်ထားသော မီနူးဖြစ်ပြီး ယခုအခါ လူကြိုက်များလျက် ရှိပါသည်။ ထို့အပြင် ဟင်းလင်းပွင့်မီးဖိုချောင်ကို အသုံးပြုထားသော မိမိတို့ဆိုင်တွင် အရသာကလည်း ကောင်း၊ မီးဖိုချောင်အတွင်းမှ ဆိုင်ဝန်ထမ်းများ၏ အခြေအနေကလည်း ဧည့်သည်များ၏ အထင်အမြင်အပေါ် ကြီးမားစွာ သက်ရောက်မှု ရှိစေပါသည်။ ထိုအတွက် သွက်သွက်လက်လက် ရှိမှုနှင့် ရွှင်လန်းမှု စသဖြင့် သွားလာလှုပ်ရှားမှုအမူအရာများတွင်လည်း သတိပြုရန် အသေးစိတ် ဂရုတစိုက် ညွှန်ကြားသင်ပြလျက် ရှိပါသည်။

နောင်တွင် မိနိုစံကို ဆိုင်ဖွင့်ချိန်များတွင် ခေါင်းဆောင်မှုစွမ်းရည် ပြသမည်ဟု မျှော်လင့်ထားပါသည်။ ထိုအတွက် အခွင့်အလမ်း ဖော်ဆောင်နိုင်သည်မှာ ကုန်ကျစရိတ်သိရှိရေး၊ အရောင်းစီမံခန့်ခွဲရေး၊ ဝန်ထမ်း ပျိုးထောင်မွေးထုတ်ရေးအပြင် အရောင်းမြှင့်တင်ရေးအတွက် ဈေးကွက်ရှာဖွေရေး စသော အရည်အချင်းများ ဖြစ်ပါသည်။ မိနိုစံမှ နောင်တစ်ချိန်အတွက် ရည်မှန်းထားသော စားသောက်ဆိုင်၏ စီမံခန့်ခွဲမှုတွင် စားဖိုမှူးအရည်အချင်းအပြင် ထိုသို့သော ဆိုင်၏ စီမံခန့်ခွဲမှုအရည်အချင်းများကိုလည်း မရှိမဖြစ် လိုအပ်ပါသည်။ အရသာ၊ ဝန်ဆောင်မှု၊ သန့်ရှင်းရေးနှင့်ကျန်းမာရေးနှင့်ညီညွတ်မှု၊ စီမံခန့်ခွဲမှု၊ ဈေးကွက်ရှာဖွေရေးတို့ကို ဟန်ချက်ညီစွာ ထိန်းသိမ်းထားခြင်းသည် စီမံခန့်ခွဲမှု တည်ငြိမ်ခြင်းကို ဖြစ်စေသည်ဟု ရှင်းပြပြီး အရည်အချင်း တိုးတက်စေရန် ကူညီပေးလျက် ရှိပါသည်။

ဟင်းလျာများကို ဧည့်သည်များ ပျော်ရွှင်စွာ သုံးဆောင်ခံစားနိုင်ရန်အတွက် အရသာသာမက ဆိုင်အတွင်း သန့်ရှင်းမှု ရှိခြင်း၊ ဟင်းပွဲပြင်ဆင်မှု လှပခြင်း၊ ဆိုင်ဝန်ထမ်းများ၏ အပြုအမူများ စသဖြင့် အရာအားလုံးကို စဉ်းစားလုပ်ကိုင်ရန် လိုအပ်ပါသည်။ ရခဲလှသော လူ့ဘဝ၏ တန်ဖိုးရှိသောအချိန်ကို ဂျပန်နိုင်ငံတွင် ဖြတ်သန်းလျက် ရှိတဲ့အတွက် ဂျပန်နိုင်ငံတွင်သာ ရရှိနိုင်သော ဧည့်ဝတ်ကျေပွန်ခြင်းယဉ်ကျေးမှုနှင့် တန်ဖိုးထားမှုကို လေ့လာသင်ယူပြီး အမိနိုင်ငံသို့ ပြန်ယူသွားစေလိုပါသည်။

မိမိတို့ဆိုင်သည် ယခင်ကတည်းက အချိန်ပိုင်းအလုပ်သမားအဖြစ် နိုင်ငံခြားသားကျောင်းသားများကို ခန့်အပ်လျက် ရှိသည့်အပြင် ကမ္ဘာတစ်ဝှမ်းမှ ဂျပန်နိုင်ငံသို့ အများအပြား လာရောက်လည်ပတ်ကြသော ဧည့်သည်များ ဆိုင်သို့ လာရောက်ကြသောကြောင့် ဝန်ထမ်းများသည် နိုင်ငံခြားသားအလုပ်သမားများနှင့် အတူတကွ အလုပ်လုပ်ခြင်းနှင့် ပတ်သက်၍ အထူးတလည် စိတ်ထဲ ထားသည့်ပုံ မရဟု ထင်မြင်မိပါသည်။

မိနိုစံ၏ လူနေမှုဘဝအခြေအနေနှင့် ပတ်သက်၍မူ ကာယကံရှင်သည် အသက် ၄၀ အရွယ်တွင် မိမိခြေထောက်ပေါ် မိမိ ရပ်တည်နေခြင်း ဖြစ်ပြီး မှတ်ပုံတင်ရထောက်ပံ့ရေးအဖွဲ့အစည်းထံမှ အရည်အသွေးမြင့် အထောက်အပံ့များ ရနေသောကြောင့် မိမိဆိုင်တွင် အလုပ်လုပ်ရသည်မှာ အခက်အခဲ သိပ်မရှိပါ။

ိုင်ငံခြားသားဝန်ထမ်းများကို အလုပ်ခန့်အပ်ရာတွင် ဆာ့ပိုရိုမြို့တွင် ထိုနိုင်ငံခြားသား၏ ဇာတိဖွားများအသင်းအဖွဲ့ ရှိမရှိကို မိမိတို့ သေချာစုံစမ်းမေးမြန်းလေ့ ရှိပါသည်။ နိုင်ငံခြားသားအလုပ်သမား ကာယကံရှင်၏ အလုပ်လုပ်လိုစိတ် မည်မျှပင် ပြင်းပြစေကာမူ လုပ်ငန်းခွင်ပြင်ပတွင် နေစရာနေရာ သို့မဟုတ် လူမှုအသင်းအဖွဲ့ မရှိပါက အလုပ်ကို စိတ်အေးချမ်းသာစွာ ဆက်လုပ်နိုင်ရန် ခက်ခဲသည်ဟု ထင်သောကြောင့် ဖြစ်ပါသည်။ အမှန်တကယ်က ထိုအသင်းအဖွဲ့တွင် ပါဝင်ခြင်းရှိမရှိသည် ကာယကံရှင် ဆုံးဖြတ်ရမည့်ကိစ္စ ဖြစ်သော်လည်း အလုပ်ခန့်အပ်ချိန်၌ ဆာ့ပိုရိုမြို့တွင် လူမှုအသင်းအဖွဲ့ရှိသော နိုင်ငံသားများကို ရွေးချယ်ခန့်အပ်ပြီး စဉ်ဆက်မပြတ် အလုပ်လုပ်နိုင်သော ပတ်ဝန်းကျင်ကို တည်ဆောက်ရန် ကြိုးပမ်းဆောင်ရွက်လျက် ရှိပါသည်။

ိုင်ငံခြားသားလုပ်သားများကို လက်ခံခန့်အပ်ရာတွင် နိုင်ငံသားကွဲပြားမှုကို စိတ်ထဲ မထားဘဲ လူတစ်ယောက်၏ ကိုယ်ရေးကိုယ်တာအဖြစ် လေးစားစွာ ဆက်ဆံသွားရန် အရေးကြီးသည်ဟု ထင်ပါသည်။ နောင်တွင်လည်း မိမိတို့ဆိုင်တွင် မည်သို့ပင် နိုင်ငံသား ကွဲပြားပါစေ မိမိတို့၏ စီမံခန့်ခွဲမှု အတွေးအမြင်နှင့် တန်ဖိုးထားမှုများကို စာနာနားလည်သူများအား ရွေးချယ်ခန့်အပ်ပြီး အတူတကွ အလုပ်လုပ်ကိုင်သွားလိုပါသည်။