ဤကုမ္ပဏီသည် ရှီဇုအိုကာ့စီရင်စုတွင်းရှိ အနောက်တိုင်းမုန့်ဆိုင် ၅ ဆိုင်ကို စီမံခန့်ခွဲလျက် ရှိပါသည်။ အထူးကျွမ်းကျင်လုပ်သားနိုင်ငံခြားသား ၄ ဦးသည် အ‌ရောင်းဆိုင်အသီးသီးတွင် ရောင်းချသော ကိတ်မုန့်နှင့် မုန့်ဖုတ်စက်ရုံတွင် အလုပ်လုပ်လျက် ရှိပါသည်။

ထုတ်လုပ်ရေးစက်ရုံ ရှိသော ဟာမားမားဆုမြို့သည် မော်တော်ကား၊ စက်ဘီး၊ ဂီတတူရိယာ စသည်တို့ ထုတ်လုပ်သည့် ကုမ္ပဏီကြီးများ၏ ရုံးချုပ်များ ဖွင့်လှစ်ထားပြီး ထိုကုမ္ပဏီကြီးများကို အထောက်အကူ ပြုနေသော တစ်ဆင့်ခံကန်ထရိုက်ကုမ္ပဏီ များစွာ ရှိနေသော နေရာလည်း ဖြစ်ပါသည်။ ထိုကုမ္ပဏီများ၏ စက်ရုံများတွင် အလုပ်သမား ခေါ်ယူမှု အဆက်မပြတ် ရှိနေသည့်အတွက် စားသောက်ကုန်ထုတ်လုပ်ရေးလုပ်ငန်းတွင် လူခေါ်ရ ခက်တတ်ပြီး ယခင်ကတည်းကပင် ဝန်ထမ်းမလုံလောက်မှုပြဿနာကို ကြုံတွေ့နေခဲ့ရပါသည်။

တစ်ခါက ကိတ်မုန့်နှင့် အနောက်တိုင်းမုန့်များ ထုတ်လုပ်ရေးသည် [လက်မှုအတတ်ပညာ] လိုအပ်သည့်အလုပ် ဖြစ်ခဲ့ပြီး ယခုအခါ စက်ယန္တရားများ တိုးတက်လာကာ သက်ဆိုင်ရာ အထူးပြုနည်းပညာ လိုအပ်သော လုပ်ငန်းစဉ်များမှာ ထိုမျှ များပြားစွာ မရှိတော့ပေ။ ဤကုမ္ပဏီပိုင် စက်ရုံသည်လည်း စက်ယန္တရားများဖြင့် လည်ပတ်လုပ်ဆောင်နေပြီဖြစ်၍ နိုင်ငံခြားသားဝန်ထမ်းများပင် အလွန် အလုပ်လုပ်ရ လွယ်ကူသည့် ပတ်ဝန်းကျင် မဟုတ်ဘူးလားဟု ‌တွေးမိပြီး အထူးကျွမ်းကျင်လုပ်သားနိုင်ငံခြားသားများကို စတင်ခေါ်ယူခဲ့ပါသည်။

ယခု အလုပ်လုပ်နေသော အထူးကျွမ်းကျင်လုပ်သားနိုင်ငံခြားသားများမှာ အမျိုးသား ၂ ဦးနှင့် အမျိုးသမီး ၂ ဦး စုစုပေါင်း ၄ ဦး ဖြစ်ပြီး ဝန်ထမ်းအားလုံးသည် အနောက်တိုင်းမုန့် ထုတ်လုပ်ရေးအကူအလုပ်ကို လုပ်ကိုင်နေပါသည်။ ဖုတ်မည့် မုန့်သားများ တင်ထားသော သံဗန်းကို မုန့်ဖုတ်စက်ထဲ ထည့်လိုက်ထုတ်လိုက် စသဖြင့် ခွန်အားလိုအပ်သော အလုပ်ကို အဓိကအားဖြင့် အမျိုးသားများ တာဝန်ယူလုပ်ကိုင်ပြီး အမျိုးသမီးများကို ကိတ်မုန့်အလှဆင်ခြင်း စသည်ကို တာဝန်ပေးထားပါသည်။

အလုပ်လုပ်ပုံမှာ တကယ်ပင် လေးနက်တည်ကြည်ကြပြီး ဂျပန်လူမျိုးဝန်ထမ်းများနှင့် တစ်ထပ်တည်း တူညီသော အရည်အသွေးဖြင့် အလုပ် လုပ်နိုင်ကြပါသည်။ ကိတ်မုန့်နှင့် အနောက်တိုင်းမုန့်များ လုပ်ရာတွင် သုံးသည့် ထူးခြားသော ပညာရပ်ဝေါဟာရများလည်း ရှိသောကြောင့် ဂျပန်ဘာသာ သင်ယူလေ့လာရသည်မှာ ပင်ပန်းမည်ဟု ထင်သော်လည်း ထိုအရာများကို အသီးသီး သင်ယူလေ့လာနေကြပုံ ရပါသည်။ အမျိုးသမီး ၂ ဦးသည် အလုပ် စလုပ်သည်မှ ၁ နှစ်ခန့် ကြာပြီ ဖြစ်ပြီး လက်ရာ သေသပ်ကောင်းမွန်၍ ကိတ်ခရင်မ်ကို အိတ်မှ ညှစ်ထုတ်၍ ကိတ်အလှဆင်ခြင်း စသည့် နည်းပညာများလည်း တိုးတက်လျက် ရှိပေသည်။ နောက်နောင်တွင် Nape နည်းပညာ (ကိတ်မုန့် စသည်တို့၏ အပေါ်ယံမျက်နှာပြင်တွင် ခရင်မ်သုတ်ခြင်းအလုပ်) ကိုလည်း လေ့လာဆည်းပူးစေပြီး အလှဆင်ထားသောကိတ်များကို တစ်ယောက်တည်းဖြင့် အပြီးပြုလုပ်နိုင်သည်အထိ ဖြစ်စေချင်သည်ဟု မျှော်လင့်နေပါသည်။