ဤဟိုတယ်သည် ကမ္ဘာ့သဘာဝအမွေအနှစ်နှင့် ရှီရဲ့တို့ခိုခရီးသွားစခန်း ဖြစ်ရာ အူတို့ရို့ဒေသတွင် တည်ရှိပြီး ကြီးကျယ်ခမ်းနားသော သဘာဝနှင့် တောရိုင်းတိရစ္ဆာန်များ ကြည့်ရှုလေ့လာခြင်း၊ စီးမျောနေသော ရေခဲတုံးများကို ပျော်ရွှင်ခံစားမည့် ဧည့်သည်များစွာကို ကြိုဆိုလျက် ရှိပါသည်။ ‌ဒေသတွင်း၌ ကြီးမားသော ဟိုတယ်တစ်ခု ဖြစ်သော်လည်း များပြားလှစွာသော ဟိုတယ်နှင့် ခရီးသွားလုပ်ငန်းမှ လူကြီးမင်းတို့နှင့် အတူတူပင် ဝန်ထမ်းမလုံလောက်မှုသည် ဆိုးရွားသော စိန်ခေါ်မှုတစ်ရပ် ဖြစ်နေပါသည်။ ဂျပန်လူမျိုးများကို အလုပ်ခေါ်ယူသော်လည်း လာမလျှောက်ကြသော အခြေအနေအတွင်း ဝန်ထမ်းမလုံ‌လောက်မှုကို ဖြည့်ဆည်းရန် ရည်ရွယ်၍ နိုင်ငံခြားသားဝန်ထမ်းများကို စတင်၍ လက်ခံခန့်အပ်ခဲ့ပါသည်။

အစပိုင်းတွင် စိတ်ပူပန်မှုများ ရှိခဲ့သော်လည်း အခုအချိန် အတူတကွ အလုပ်လုပ်ကြည့်သည့်အခါ နိုင်ငံခြားသားဝန်ထမ်းများ ဖြစ်သော သူတို့အားလုံးသည် လေးနက်တည်ကြည်စွာဖြင့် အလုပ်ကို ကြိုးစားလုပ်ကိုင်ပြီး ပတ်ဝန်းကျင်အသစ်တွင် နေသားကျရန် ကြိုးစားကာ ဂျပန်လူမျိုးဝန်ထမ်းများနှင့်လည်း တက်ကြွစွာ ပေါင်းသင်းဆက်ဆံခဲ့ကြပါသည်။ အလုပ်အပေါ် တက်ကြွမှုနှင့် လေ့လာသင်ယူလိုစိတ် ထက်သန်မှုသည် ဂျပန်လူမျိုးများထက် သာလွန်သည်ဟု ခံစားမိပါသည်။ ထို့အပြင် အထူးကျွမ်းကျင်လုပ်သား နိုင်ငံခြားသားဝန်ထမ်းများသည် ကျွမ်းကျင်မှုအဆင့် အချို့ရှိကြပြီး မိမိတို့ မျှော်လင့်ထားသည်ထက် ကျော်လွန်၍ အလုပ် လုပ်ကိုင်လျက် ရှိပါသည်။ ဟိုတယ်ကို အထောက်အကူပြုသော “အင်အား” အဖြစ် နိုင်ငံခြားသားဝန်ထမ်းများကို ရှေ့ဆက်၍ လက်ခံခန့်အပ်နေစဉ်ပင် ဦးရေ နည်းနည်းစီ များလာပြီး ယခုဆိုလျှင် အထူးကျွမ်းကျင်လုပ်သား၊ နည်းပညာ၊ လူမှုအသိပညာနှင့် နိုင်ငံတကာလုပ်ငန်းတာဝန်၊ အလုပ်သင်သင်တန်းသား(*ဟိုတယ်အလုပ်အကိုင်) ၊ အလုပ်သင်အစီအစဉ်တို့မှ ဝန်ထမ်းများ စုပေါင်း၍ စုစုပေါင်း ဦးရေ ၄၀ဦးထိ တိုးလာပြီ ဖြစ်ပါသည်။

အထူးကျွမ်းကျင်လုပ်သားနိုင်ငံခြားသား ၁၄ ဦးသည် ဤဟိုတယ်၏ ထူးခြားသော ဝိသေသတစ်ခု ဖြစ်သည့် ဘူဖေးစားသောက်ဆိုင်[Marusukoi] နှင့် ခန်းမဆောင်တွင် ဧည့်သည်ဝန်ဆောင်မှုပေးခြင်းနှင့် အစားအသောက်များတည်ခင်းခြင်း၊ ဟင်းလင်းပွင့်မီးဖိုခန်းနှင့် စားဖိုဆောင်တွင် ချက်ပြုတ်ခြင်း စသည်တို့ကို တာဝန်ယူ လုပ်ကိုင်လျက် ရှိပါသည်။ အမြဲတမ်း ကြိုးစား၍ ပြောဆိုဆက်ဆံမှု ပြုပြီး ဧည့်သည်များ ပျော်ရွှင်စေရန် ကြိုးပမ်းနေသော ဟန်ပန်ကို တွေ့မြင်နိုင်ပြီး ဧည့်သည်များထံမှလည်း [ဂျပန်စာ တော်လိုက်တာ။] [အရမ်းအာရုံစိုက်ပြီး လိမ္မာပါးနပ်တယ်] ဟူသော စကားသံများ ကြားနေရပါသည်။ တစ်ခါတစ်ရံတွင် [xxx စံက ပြုံးရွှင်နေပြီး အရမ်းကြိုးစားနေခဲ့တာ။] ဟု လူနာမည် တပ်လျက် ချီးမွမ်းခံရသည်လည်း ရှိပြီး ဧည့်သည်များထံမှ ထိုသို့ အကဲဖြတ်မှတ်ချက်ပေးမှုကို ကာယကံရှင်ထံ သေသေချာချာ ပြန်လည်ပြောပြပြီး အလုပ်လုပ်ချင်စိတ်ကို မြှင့်တင်ပေးလျက် ရှိပါသည်။

ငယ်ရွယ်သော နိုင်ငံခြားသားဝန်ထမ်းများစွာ လက်ခံခန့်အပ်ခဲ့ခြင်းဖြင့် အလုပ်ခွင်ပတ်ဝန်းကျင် အလွန် လင်းလက်တောက်ပလာသည်ဟု ထင်ပါသည်။ ပထမဆုံးရောက်ဖူးသော နိုင်ငံတွင် စိတ်လှုပ်ရှားစွာဖြင့် အလုပ်ကို ကြိုးပမ်းလုပ်ကိုင်ကြသော နိုင်ငံခြားသားဝန်ထမ်းများ၏ ပုံစံကို ကြည့်ပြီး ဝါရင့်ဂျပန်ဝန်ထမ်းများသည် [မိမိတို့သည်လည်း အဲလိုအချိန်မျိုး ရှိခဲ့တာပဲ။] ဟု အောက်မေ့သတိရနေပုံ ‌ပေါ်ကာ ပြန်လည် နိုင်ငံခြားသားဝန်ထမ်းများနှင့် အတူ နုပျိုလန်းဆန်းလာသော ခံစားချက်များဖြင့် အလုပ်လုပ်ပုံကို တွေ့မြင်နိုင်ပါသည်။ ထိုအချက်သည် ဝန်ထမ်းမလုံလောက်မှုအခြေအနေ ပြေလည်သွားရုံမျှမက နိုင်ငံခြားသားဝန်ထမ်းများကြောင့် ဖြစ်ပေါ်လာသော ဝမ်းသာဖွယ် ပြောင်းလဲမှု ဖြစ်ပါသည်။

လိုအပ်ချက်မရှိ တက်ကြွစွာ လုပ်ကိုင်နေပြီဖြစ်သော အထူးကျွမ်းကျင်လုပ်သား နိုင်ငံခြားသားဝန်ထမ်းများ ဖြစ်သော်လည်း နောက်နောင်တွင် [ဂျပန်ဘာသာစကား အရည်အချင်း] [ဂျပန်ဆန်သည့် ယဉ်ကျေးသောအမူအကျင့်များ လေ့လာဆည်းပူးခြင်း] [ဒေသတွင်းမှာသာရှိသော တမူထူးခြားသော ခရီးသွားဗဟုသုတ] ကို ပိုမိုမြှင့်တင်ရန်အလို့ငှာ လိုအပ်သော ညွှန်ကြားပြသမှုနှင့် သင်တန်းများ ပေးသွားရန် စဉ်းစားလျက် ရှိပါသည်။ ဟိုတယ်ဝန်ထမ်းများနှင့် စကားစမြည် ပြောဆိုခြင်းကို ခရီး၏ ပျော်ရွှင်မှုတစ်ခုအဖြစ် မှတ်ယူထားသော ဧည့်သည် များစွာရှိပြီး ဘာသာစကားအသုံးအနှုန်းနှင့် ဂျပန်စတိုင် ယဉ်ကျေးသောအမူအကျင့်များ၊ ခရီးသွားဗဟုသုတများကို ပိုမို တိုးတက်စေပြီး ဧည့်သည်များ၏ လိုအပ်ချက်ကို ဖြည့်ဆည်းပေးခြင်းက ဧည့်သည်များထံမှ အကဲဖြတ်မှတ်ချက်ပေးမှု ရရှိမည်မှာ အမှန်ပင် ဖြစ်ပြီး ကာယကံရှင်၏ မိမိကိုယ်ကို ယုံကြည်မှုကို မြှင့်တင်ရာလည်း ရောက်မည်ဟု မျှော်လင့်ထားပါသည်။