ពលករជំនាញជនបរទេសកំពុងធ្វើការលើខ្សែចង្វាក់ផលិតកម្មដែលផលិតដូចជា នំយូកាន់ នំម៉ូណាកា និង នំគីនត្សឹបា។ បន្ថែមពីការងារផ្នែកត្រៀមរៀបចំផលិត ការងារដុតនំ ការងារវេចខ្ចប់ និងផ្នែកការងារផលិតនំរួចរាល់ បុគ្គលិកដែលធ្វើការយូរក៏ទទួលខុសត្រូវក្នុងការបូកសរុបលទ្ធផលការផលិត វាយបញ្ចូលនូវកំណត់ត្រា និងដោះស្រាយភ្លាមៗនៅពេលមានបញ្ហាកើតឡើង។ យើងបានទទួលយកធនធានជនបរទេសអស់រយៈពេលប្រហែល១០ឆ្នាំមកហើយ លើសពាក់កណ្តាលនៃពលករជំនាញជនបរទេសរាល់ថ្ងៃនេះ គឺពួកគាត់បានបញ្ចប់ការងារក្នុងមានជាសិក្ខាកាមនៅក្រុមហ៊ុនរបស់យើង។ ពួកគាត់ធ្វើការយ៉ាងម៉ត់ចត់ដូចបុគ្គលិកជប៉ុនដែរ ហើយនៅពេលដែលពួកគាត់ទំនេរ ពួកគាត់ចាប់ផ្តើមសម្អាត សកម្មក្នុងការធ្វើការ ដូច្នេះយើងគិតថាពួកគាត់គឺអាចពឹងពាក់បាន។

ជំនាញដែលយើងចង់ឲ្យពលករជំនាញជនបរទេស ពង្រីកសមត្ថភាពបន្ថែមទៀតនាពេលអនាគតនោះគឺ ជំនាញគ្រប់គ្រង និងជំនាញទំនាក់ទំនងជាភាសាជប៉ុន។ នៅក្នុងជំនាញការគ្រប់គ្រង យើងរំពឹងថាពួកគាត់នឹងបង្កើនសមត្ថភាពក្នុងការគ្រប់គ្រងកន្លែងការងារ ពង្រឹងការយល់ដឹងទៅលើការគ្រប់គ្រងកម្លាំងពលកម្ម និងទិន្នផលនៃផលិតភាព។ លើសពីនេះ ក្នុងនាមជាអ្នកគ្រប់គ្រង ដោយសារតែតម្រូវឲ្យផ្តល់នូវការណែនាំដ៏ត្រឹមត្រូវច្បាស់លាស់ដល់បុគ្គលិក ដូច្នេះត្រូវមានជំនាញភាសាជប៉ុនកាន់តែខ្ពស់ និងជំនាញទំនាក់ទំនងផងដែរ។ បញ្ហាទាំងនោះនឹងត្រូវដោះស្រាយ ហើយយើងកំពុងពិចារណាចង់ឲ្យពួកគាត់ក្លាយជាធនធានមនុស្សដែលជាប្រធានផ្នែកខ្សែចង្វាក់ផលិតកម្មនៅកន្លែងធ្វើការ ឬក៏អាចជាអ្នកគ្រប់គ្រងដែលខ្ពស់ជាងប្រធានផ្នែកខ្សែចង្វាក់ផលិតកម្ម។

ចក្ខុវិស័យរបស់ក្រុមហ៊ុនយើងគឺក្លាយជា "ហាងនំជប៉ុនដែលទាក់ទាញពិភពលោក" ។ បច្ចុប្បន្នពលករជំនាញជនបរទេស២នាក់ កំពុងខិតខំពុះពារ ដើម្បីក្លាយជាអ្នកជំនាញធ្វើនំជប៉ុនចូលណាម៉ាហ្គាសុីដែលជាការងារមួយ ដើម្បីសម្រេចបានលទ្ធផលចេញជារូបរាង។ហើយវាគឺជាប្រព័ន្ធបណ្តុះបណ្តាលរបស់ក្រុមហ៊ុនយើងដែលបានចាប់ផ្តើមក្នុងឆ្នាំនេះ យើងជ្រើសរើសធនធានជនបរទេសនៅក្នុងក្រុមហ៊ុន ហើយបានជ្រើសរើសអ្នកហាត់រៀនធ្វើការដែលមានជំនាញទឹកដៃល្អ និងមានទេពកោសល្យប៉ិនប្រសប់។ សព្វថ្ងៃ អ្នកទាំងពីរកំពុងធ្វើការនៅរោងចក្របណ្តើរ និងកំពុងទទួលវគ្គបណ្តុះបណ្តាលពិសេសនៅក្នុងក្រុមហ៊ុនជាប្រចាំ ដោយពួកគាត់កំពុងសិក្សាចំណេះវិជ្ជា និងជំនាញដែលចាំបាច់ដើម្បីចេះធ្វើនំជប៉ុនចូលណាម៉ាហ្គាសុី។ យើងមានគម្រោងចំណាយពេលប្រហែល២ឆ្នាំ ក្នុងការដុសខាត់ជំនាញឲ្យខ្លាំង ដើម្បីអាចប្រឡងជាប់ជាអ្នកជំនាញធ្វើនំកម្រិតពីរ (ការងារផលិតនំជប៉ុន) ។ មិនត្រឹមតែប៉ុណ្ណោះ យើងសង្ឃឹមថានៅពេលអនាគត ពួកគាត់នឹងបង្ហាញការសម្តែងនៅក្នុងកម្មវិធីផ្សេងៗដូចជា ពិព័រណ៍នំជប៉ុនដែលប្រាព្វឡើងនៅបរទេសជាដើម។ ហើយយើងក៏សង្ឃឹមថាពួកគាត់នឹងអភិវឌ្ឍខ្លួនក្លាយទៅជាវត្តមានមួយរូប ក្នុងការួមចំណែកទៅដល់ការផ្សព្វផ្សាយរីករាលដាលជាសកលលោកនៃវប្បធម៌អាហារជប៉ុន និងថែមទាំងនំជប៉ុនក្រុមហ៊ុនរបស់យើងផងដែរ។

ម្យ៉ាងទៀត យើងមានផ្តល់ប្រាក់ឧបត្ថម្ភសម្រាប់ការប្រលងជាប់ជំនាញ និងតេស្តសមត្ថភាពភាសាជប៉ុនទាំងនេះ ប្រាក់ឧបត្ថម្ភសញ្ញាប័ត្រនោះនឹងផ្តល់ជូនដល់អ្នកដែលបានប្រឡងជាប់។ ដោយសារសេចក្តីខិតខំប្រឹងប្រែងត្រូវបានឆ្លុះបញ្ចាំងតាមរយៈប្រាក់ខែ ដូច្នេះវាហាក់ដូចកត្តាមួយជំរុញឲ្យពលករជំនាញជនបរទេសមានកម្លាំងចិត្តខិតខំ ដើម្បីទទួលបានជំនាញកាន់តែខ្ពស់។

ពលករជំនាញជនបរទេសទាំងអស់របស់ក្រុមហ៊ុនយើង សុទ្ធតែជាជនជាតិវៀតណាម។ សព្វថ្ងៃនេះ ពួកគាត់គ្រប់គ្នាធ្វើការយ៉ាងចុះសម្រុងគ្នា ប៉ុន្តែកន្លងមកមានក្រុមអ្នកដែលត្រូវគ្នា ហើយមានបញ្ហាក្នុងក្រុម ហើយធ្លាប់ធ្វើឲ្យមានផលប៉ះពាល់ដល់កន្លែងធ្វើការ។ បន្ទាប់ពីស្តាប់និងសួរនាំពីស្ថានភាពរួច ក្រុមហ៊ុនបានផ្តល់ការណែនាំ ហើយបញ្ហាក៏ត្រូវបានដោះស្រាយ ប៉ុន្តែរឿងនេះបានធ្វើឲ្យយើងយល់ច្បាស់ថា ខណៈពេលដែលធនធានបរទេសកើនឡើង ការយកចិត្តទុកដាក់លើទំនាក់ទំនងរវាងមនុស្សគឺមានសារៈសំខាន់ណាស់។ ចាប់ពីឆ្នាំនេះទៅ ពួកយើងបានបើកវគ្គសិក្សាភាសាវៀតណាមសម្រាប់បុគ្គលិកជប៉ុន ដើម្បីស្វែងយល់ពីធនធានបរទេសឲ្យកាន់តែច្បាស់ជាងមុន។ យើងផ្តោតលើការរៀនពាក្យគារវកិច្ចសាមញ្ញៗ លេខ និងប្រយោគដែលប្រើប្រាស់ជាក់ស្តែងក្នុងអំឡុងពេលធ្វើការ ប៉ុន្តែការបញ្ចេញសំឡេងគឺពិបាក ដូច្នេះពួកគាត់គ្រប់គ្នាកំពុងខិតខំប្រឹងប្រែងតស៊ូ។ ផ្ទុយមកវិញ យើងមានអារម្មណ៍ថា ភាសាជប៉ុនគឺលំបាកសម្រាប់ជនជាតិវៀតណាម ហើយយើងគិតថា យើងបានចែករំលែកនូវភាពលំបាកមួយផ្នែករបស់ធនធានជនបរទេស។

នាពេលអនាគត យើងរំពឹងថា ជាពិសេសអ្នកដែលជាពលករជំនាញកម្រិត២ នឹងដើរតួយ៉ាងសកម្មនៅក្នុងមុខតំណែងជាអ្នកគ្រប់គ្រង។ ដើម្បីផ្តល់ការបណ្តុះបណ្តាលនេះ យើងកំពុងពិចារណាឲ្យពួកគាត់ចូលរួមក្នុងវគ្គបណ្តុះបណ្តាលស្របទៅតាមកម្រិតផ្សេងៗគ្នារបស់ក្រុមហ៊ុន ហើយយើងក៏កំពុងពិចារណាថានឹងបង្កើតប្រព័ន្ធមួយដែលអនុញ្ញាតឲ្យពួកគាត់ធ្វើការបានរយៈពេលយូ។ ម៉្យាងវិញទៀត ដើម្បីផ្សាភ្ជាប់ការធ្វើនំជប៉ុន ថែមទាំង "ការផលិតរបស់ផ្សេងៗ" របស់ជប៉ុនទៅនឹងអនាគត ខ្ញុំមានអារម្មណ៍ថាយើងចាំបាច់ត្រូវបង្កើនជំនាញ និងបង្កើតបរិយាកាសការងារដែលអាចឲ្យធ្វើការបាន និងអត្ថប្រយោជន៍ការងារដោយមិនប្រកាន់ពីជាតិសាសន៍។ ដើម្បីធានាបានថាវប្បធម៌នំជប៉ុនមាននិរន្តរភាព យើងគិតថាចង់បន្តធ្វើការ បូករួមនឹងបណ្តុះបណ្តាលអ្នកជំនាញដែលគាត់នឹងផ្សព្វផ្សាយនំជប៉ុនលាតសន្ធឹងគ្របដណ្ដប់ជុំវិញពិភពលោក។