ក្រុមហ៊ុនរបស់យើងភាគច្រើនផលិតម្ហូបសម្រាប់លក់នៅហាងម៉ាតដែលមានម្ហូបអាហារជាប្រភេទមី មីកំដៅនិងអាហារបន្ទាប់បន្សំជាដើម។ ដោយសារសង្វាក់ផលិតកម្មយើងធ្វើ២៤ម៉ោង៣៦៥ថ្ងៃក្នុងមួយឆ្នាំ ដូច្នេះយើងមានការលំបាកក្នុងការរក្សាបុគ្គលិក ជាពិសេសបុគ្គលិកវេនពេលយប់ ហើយប្រហែល១០ឆ្នាំមុនយើងបានចាប់ផ្តើមជ្រើសរើសយកធនធានជនបរទេសយ៉ាងសកម្ម។ ស្របទៅតាមទស្សនវិស័យរបស់យើងដើម្បីក្លាយជាក្រុមហ៊ុនសកលលោក យើងគិតថា ការជួយគាំទ្រទៅលើការងារនិងជីវភាពរស់នៅរបស់ធនធានជនបរទេសគឺជាតួនាទីរបស់យើង ហើយបច្ចុប្បន្ននេះយើងក៏កំពុងធ្វើការជាមួយធនធានជនបរទេស គ្រាន់តែពលករជំនាញមានលើសពី២០០នាក់។ ភាគច្រើនយើងជ្រើសរើសយកពលករជំនាញបរទេសតាមរយៈការណែនាំបន្ត មានន័យថាបុគ្គលិករបស់យើងណែនាំអ្នកស្គាល់ដែលពួកគេទាំងនោះកំពុងស្វែងរកការងារ។ ចំពោះខាងក្រុមហ៊ុនដែលជារើសក៏មានអារម្មណ៍ទុកចិត្ត ព្រោះមានការណែនាំពីបុគ្គលិកដែលជាអ្នកម៉ត់ចត់ក្នុងការងារ ហើយយើងគិតថាយើងអាចជ្រើសរើសបានអ្នកដែលខ្លាំងពូកែ។ ម៉្យាងវិញទៀត នៅក្នុងករណីយើងជ្រើសរើសតាមការណែនាំនេះ នៅក្រុមប្រឹក្សាជំនាញជាក់លាក់នៃឧស្សាហកម្មម្ហូបអាហារ វាអាចនឹងជាប់ពាក់ព័ន្ធការជ្រើសរើសបុគ្គលិកផ្សេងទៀតដែលពួកគេបដិសេធមិនធ្វើ។ ដូច្នេះ យើងយកចិត្តទុកដាក់និងប្រុងប្រយ័ត្នយ៉ាងខ្លាំងដោយសួរសំណួរលម្អិតក្នុងអំឡុងពេលសម្ភាសន៍ ហើយក្នុងករណីខ្លះ យើងនឹងសាកសួរបញ្ជាក់ទៅក្រុមហ៊ុនពីមុនដែលគេធ្លាប់បានធ្វើការ ឬក្រុមហ៊ុនបច្ចុប្បន្នដែលកំពុងធ្វើការ។

យើងឱ្យពលករជំនាញធ្វើការគ្រប់ដំណើរការនៃការផលិតមានដូចជា ផលិតប្រភេទមី ថ្លឹង ការបង្កើតគ្រឿងផ្សំ រៀបម្ហូបដាក់ចាន ដឹកជញ្ជូន ចែកចាយផលិតផល ហើយយើងផ្តល់តួនាទីជាអ្នកគ្រប់គ្រងដូចជា អ្នកទទួលបន្ទុកគ្រប់គ្រងនៅក្នុងរោងចក្រផ្ទាល់ ប្រធានក្រុម អនុប្រធានក្រុម និងអ្នកដឹកនាំ។ ពួកគាត់ធ្វើការងារគ្រប់គ្រង រួមមានសុវត្ថិភាពនិងអនាម័យនៅកន្លែងធ្វើការ ការផលិតផលិតផលប្រកបដោយគុណភាព ការដាក់បុគ្គលិកទៅតាមផ្នែក តាមដានការដឹកជញ្ជូនជាដើម ហើយក៏ផ្តោតសំខាន់លើការបណ្តុះបណ្តាលអ្នកក្រោមបង្គាប់ផងដែរ។ យើងព្យាយាមឱ្យពួកគេបន្តកសាងអាជីពរបស់ពួកគេតាមរយៈ ការគាំទ្រទៅលើការបង្កើនជំនាញដោយអនុញ្ញាតឱ្យពួកគេទទួលបានសញ្ញាបត្រផ្ទៃក្នុងដែលទាក់ទងនឹងHACCP ហើយយើងវាយតម្លៃបុគ្គលិកពីរដងក្នុងមួយឆ្នាំ។

ក្នុងចំណោមពលករជំនាញជនបរទេសនោះ មាន២៩នាក់ដែលបានប្រលងជាប់តេស្តវាស់ស្ទង់សមត្ថភាពជំនាញកម្រិត២ ហើយ៩នាក់បានទទួលបានលក្ខណសម្បត្តិនៃការស្នាក់នៅជាពលករជំនាញកម្រិត២។ ប្រហែលពីរខែមុនការប្រឡង យើងបានរៀបចំការសម្ភាសន៍ជាមួយអ្នកប្រលងដែលមានតួនាទីជាអ្នកគ្រប់គ្រងឡើងទៅ ដើម្បីពិនិត្យមើលសមត្ថភាពភាសាជប៉ុន និងការយល់ដឹងអំពីអនាម័យចំណីអាហារ ហើយយើងក៏មានប្រព័ន្ធមួយសម្រាប់គាំទ្រអ្នកប្រលង ដូចជាការចែកសៀវភៅសិក្សា និងផ្តល់ការណែនាំជាលក្ខណបុគ្គលលើកន្លែងណាមួយដែលពួកគេមិនយល់។ មានមនុស្សលើស១០នាក់នឹងប្រឡងនៅខែមករាឆ្នាំ២០២៥នេះ ហើយពួកគាត់មានបំណងធ្វើការរយៈពេលយូរ យើងមានអារម្មណ៍ថាពួកគាត់មានឆន្ទៈខ្ពស់ក្នុងការចង់ក្លាយជាពលករជំនាញកម្រិត២។ ជាពិសេសនោះគឺ ការដែលអាចនាំសមាជិកគ្រួសារមកជាមួយបានវាហាក់ដូចជាគ្រឿងជុំរុញទឹកចិត្ត ហើយអ្នកដែលទទួលបានជាពលករជំនាញកម្រិត២រួចហើយ ថ្មីៗនេះកូនរបស់គាត់ទើបតែកើតនៅឯប្រទេសកំណើត ហើយគាត់កំពុងប្រឹងប្រែធ្វើការដោយនិយាយថា "ចង់នាំមកឱ្យឆាប់តាមដែលអាចធ្វើទៅបាន" ។

អ្វីដែលយើងរំពឹងទុកលើពលករជំនាញកម្រិតលេខ២នោះគឺ ការយល់ដឹងខ្ពស់និងជំនាញក្នុងនាមអ្នកគ្រប់គ្រងនិងអ្នកបង្រៀន។ ចំណេះដឹងមានសារៈសំខាន់ ប៉ុន្តែលើសពីនេះទៅទៀត យើងគិតថាវាសំខាន់ណាស់ក្នុងការយល់ដឹងនូវការសម្របសម្រួលអ្នកដែលធ្វើការជាមួយនៅតាមតំបន់ និងផ្នែកនីមួយៗ ហើយបង្កើតបរិយាកាសដែលអាចចង្អុលបង្ហាញប្រាប់គ្នាទៅវិញទៅមកពេលមានបញ្ហា។ ដូច្នេះ យើងឧស្សាហ៍ណែនាំប្រាប់អ្នកមានតួនាទីគ្រប់គ្រងឱ្យមានការយល់ដឹងបែបនេះ។ ម្យ៉ាងវិញទៀត ដោយសារកន្លែងធ្វើការរបស់យើងមានបុគ្គលិកជនបរទេសជាច្រើនមកពីប្រទេសផ្សេងៗ យើងក៏ចង់បណ្តុះសមត្ថភាពនៃការរួមចំណែកក្នុងការណែនាំ និងការប្រាស្រ័យទាក់ទងរវាងបុគ្គលិកជនបរទេសដូចគ្នា។