ក្រុមហ៊ុនរបស់យើងបានទទួលយកពលករជំនាញជនបរទេស ប្រហែល ៣ ឆ្នាំមកហើយ។ ក្រៅពីវិស័យសេវាកម្មម្ហូបអាហារ យើងក៏កំពុងជួលនៅក្នុងផ្នែកថែទាំ និងសម្អាតអគារផងដែរ ហើយបច្ចុប្បន្នពលករជំនាញជនបរទេសប្រហែល ១០០ នាក់កំពុងធ្វើការនៅ ៩ កន្លែង (រួមទាំងស្ថាប័នប្រតិបត្តិការដោយសាជីវកម្មជាក្រុម)។ ពេលដែលយើងខ្ញុំបានជួលដំបូង យើងខ្ញុំមានការព្រួយបារម្ភបន្តិចថា តើអ្នកប្រើប្រាស់សេវាកម្មដែលមានវ័យចំណាស់មានប្រតិកម្មចំពោះពលករជំនាញជនបរទេសយ៉ាងណា ប៉ុន្តែបុគ្គលិកលក្ខណៈរួសរាយរាក់ទាក់ និងភាពសកម្មសម្រាប់ការងារ ត្រូវបានគេវាយតម្លៃខ្ពស់ ហើយឥឡូវនេះ ពួកគេត្រូវបានអ្នកប្រើប្រាស់ពេញចិត្ត ដែលហាក់ដូចជាចៅប្រុសចៅស្រី។

ចំពោះពលករជំនាញជនបរទេសក្នុងវិស័យសេវាកម្មម្ហូបអាហារ ភាគច្រើនធ្វើម្ហូប និងតប់តែងអាហារសម្រាប់ផ្តល់ជូនដល់អ្នកប្រើប្រាស់សេវាកម្ម ក្នុងនោះមានការងារប្តូរម្ហូបអាហារទៅជាទំហំតាមមាត់ មានភាពរលោង ហាន់តូចៗ ក្រឡុកជាដើម ដើម្បីស្របទៅតាមសមត្ថភាពលេប និងស្ថានភាពរាងកាយ ព្រមទាំងការឆែកមើលវត្ថុធាតុដើមម្ហូបដែលមានអាឡែស៊ី។ បន្ថែមពីលើការធ្វើម្ហូប ក៏ផ្តល់ការងារបម្រើអតិថិជនមួយចំនួនដូចជា ការយកម្ហូបជូនភ្ញៀវ និងប្រមូលចាន និងការងារគ្រប់គ្រងហាងដូចជា ការត្រួតពិនិត្យគ្រឿងផ្សំ និងការបំពេញបន្ថែមនូវសម្ភារៈប្រើប្រាស់ជាដើមផងដែរ។

សម្រាប់បុគ្គលិកបរទេស អាហារជប៉ុនដែលបម្រើនៅស្ថាប័ននោះ មិនសូវស្គាល់ច្បាស់ទេ។ ជាឧទាហរណ៍ នៅពេលបម្រើ “ជិរ៉ាស៊ី ស៊ូស៊ី” យើងអាចយល់បានភ្លាមៗថា “គិនស៊ី តាម៉ាហ្គុ” គឺជាអ្វីដែលត្រូវដាក់ពីលើ ប៉ុន្តែជនបរទេសដែលមិនដែលឃើញម្ហូបនោះ ត្រូវតែទន្ទេញវាតាំងពីដំបូង។ ដូច្នេះហើយ ពួកគេពិនិត្យមើលបញ្ជីមុខម្ហូបជាមុន ហើយប្រសិនបើមានមុខម្ហូបដែលពួកគេមិនស្គាល់ ពួកគេខិតខំប្រឹងប្រែងសិក្សានៅលើអ៊ីនធឺណិត។ មានកំហុសខ្លះនៅដើមដំបូង ប៉ុន្តែដោយសារឆន្ទៈខ្ពស់របស់ពួកគាត់ និងការណែនាំពីបុគ្គលិកជប៉ុន ការយល់ដឹងរបស់ពួកគាត់បានរីកចម្រើន។

ភាគីយើងខ្ញុំដែលជាអ្នកទទួលជួលពួកគាត់ក៏បានប្តូរផ្លាកសញ្ញាក្នុងផ្ទះបាយទៅជា ហ៊ីរ៉ាហ្កាណា ជាដើម ដើម្បីបង្កើតបរិយាកាសងាយស្រួលសម្រាប់ជនបរទេសមកធ្វើការ។ យើងបានប្រើស្ទីគ័រក្រហមដើម្បីពន្យល់ពីរបៀប ”ចុចប៊ូតុងពណ៌ក្រហម” ក្នុងដំណើរការការងារ និងរួមបញ្ចូលរូបគំនូរលើចានដែលអមជាមួយអាហារអ្នកប្រើប្រាស់សេវាកម្ម ដែលធ្វើឱ្យកាត់បន្ថយការធ្វើកំហុស។