ក្រុមហ៊ុនយើងខ្ញុំផ្តើមទទួលយកនិស្សិតបរទេសចូលបម្រើជាការងារក្រៅម៉ោងនៅអំឡុងឆ្នាំ២០១៣ បច្ចុប្បន្ន ក្រៅពីពលករជំនាញ មានបុគ្គលិកជាជនបរទេសមានទិដ្ឋាការស្នាក់នៅជាវិស្វករ អ្នកជំនាញផ្នែកមនុស្សសាស្រ្ត កិច្ចការអន្តរជាតិ និងបម្រើការជំនាញពិសេសជាដើម។ វិស័យអាហារដ្ឋានមានកង្វះខាតកម្លាំងពលកម្មមកជាយូរឆ្នាំ។ ប្រព័ន្ធពលករជំនាញ ដែលអនុញ្ញាតឱ្យពលករជនបរទេសធ្វើការក្នុងផ្នែកសេវាកម្មអតិថិជន និងជំនួយការផ្នែកចម្អិនអាហារ ជាប្រព័ន្ធថ្មីសម្រាប់យើងខ្ញុំបម្រើការនៅក្នុងវិស័យអាហារដ្ឋាន ដោយកន្លងមកយើងខ្ញុំបានទទួលធនធានមនុស្សពីប្រទេសផ្សេងៗចាប់តាំងពីប្រព័ន្ធនេះបានផ្តើមដំណើរការដំបូង។ ពេលធ្វើការជ្រើសរើស យើងខ្ញុំធ្វើការត្រួតពិនិត្យបុគ្គលិកលក្ខណៈផ្ទាល់ខ្លួនរបស់អ្នកដាក់ពាក្យស្នើរសុំជាពិសេស រួចត្រួតពិនិត្យជំនាញ ចរិត និងលក្ខណៈពិសេសរបស់គាត់ជាដើម ដើម្បីបញ្ជាក់ពីកម្រិតត្រូវគ្នានៃការផ្គូផ្គងជាមួយនឹងធនធានមនុស្សដែលយើងកំពុងស្វែងរកនាពេលបច្ចុប្បន្ន។ ទោះការត្រួតពិនិត្យបុគ្គលិកលក្ខណៈនៅតែស្ថិតក្នុងដំណាក់កាលសាកល្បងក្តី យើងខ្ញុំកំពុងពិចារណាលើការផ្តល់ជាវិធីសាស្រ្តដែលរួមចំណែកដល់ការអនុម័តលើការជ្រើសរើសក្នុងប្រព័ន្ធទូទាំងវិស័យអាហារដ្ឋាននាពេលអនាគត។

បុគ្គលិកមានជំនាញ ភាគច្រើនធ្វើការជាបុគ្គលិកបម្រើសេវាកម្មអតិថិជនជាអ្នកលើកម្ហូប អ្នកគិតប្រាក់ក្នុងហាង និងចម្អិនអាហារនៅក្នុងកន្លែងចម្អិនម្ហូបជាដើម។ អាហារដ្ឋាននីមួយៗមានសមាសភាពបុគ្គលិកផ្សេងៗគ្នា ដោយហាងខ្លះបើកដំណើរការដោយជនបរទេសសុទ្ធ ហាងខ្លះមានបុគ្គលិកមកពីប្រទេសដូចគ្នាធ្វើការរួមគ្នា និងហាងខ្លះមានបុគ្គលិកមកពីប្រទេសផ្សេងៗធ្វើការជាមួយគ្នាជាដើម។ ក្រោយរយៈពេល ៣ឆ្នាំចាប់ពីដំណើរការប្រព័ន្ធជ្រើសរើសជនបរទេសជាពលករជំនាញ ឃើញថាក៏មានបុគ្គលិកមួយចំនួនបានប្តូរទៅធ្វើការងារនៅក្រុមហ៊ុនផ្សេងផងដែរ បន្ទាប់ពីបានធ្វើការបានមួយរយៈ។ យើងខ្ញុំមានបំណងផ្តល់ជំនួយដល់ពលករជំនាញគ្រប់រូបដែលចង់ស្វែងរកការងារថ្មី ដូច្នេះសម្រាប់ពលករដែលបានឈប់ពីការងារចាស់ យើងហៅគាត់ថាបាន “បញ្ចប់ពីការសិក្សា” នៅកន្លែងការងារមុន ព្រោះយើងខ្ញុំចង់ឃើញពួកគាត់រៀនសូត្រពីការងារនៅប្រទេសជប៉ុន មុននឹងត្រឡប់ទៅប្រទេសកំណើតរបស់ពួកគាត់។