ដើម្បីឲ្យបុគ្គលិកធ្វើការងារបានល្អហើយក្រុមហ៊ុនអាចបណ្តុះធនធានមនុស្សបានល្អ យើងយល់ថាចាំបាច់ត្រូវមានកម្លាំងពលកម្មគ្រប់គ្រាន់ហើយយើងកំពុងទទួលយកបុគ្គលិកជនជាតិបរទេស។ បុគ្គលិក2នាក់ដែលមានទិដ្ឋាការសមត្ថភាពជំនាញជាក់លាក់ បានសន្សំបទពិសោធន៍ការងារនៅក្រុមហ៊ុនយើង 6ឆ្នាំមកហើយ ហើយយើងក៏បានប្រគល់ការងារដល់ពួកគេក្នុងការធ្វើសាស៊ិមិដែលជាម្ហូបពិសេសរបស់ជប៉ុនផងដែរ។ កាលពីមុន បច្ចេកទេសរបស់ចុងភៅគឺ "មើលហើយចងចាំ" ប៉ុន្តែដើម្បីឲ្យបុគ្គលិកបរទេសដែលមានភាសានិងវប្បធម៌ផ្សេងក្រេបយកបច្ចេកទេសនេះបាន ការណែនាំបង្ហាត់ដោយប្រុងប្រយ័ត្នគឺមិនអាចខ្វះបាន។ ពេលមើលឃើញពួកគេចាប់យកបានអ្វីដែលយើងបានបង្រៀនហើយសមត្ថភាពកាន់តែកើនឡើង ពួកយើងដែលជាជនជាតិជប៉ុនបានផ្លាស់ប្តូរការយល់ឃើញកាលពីមុន ហើយបានយល់ពីសារៈសំខាន់នៃការបណ្តុះបណ្តាល។ វាក៏បាននាំឱ្យយើងពិនិត្យឡើងវិញនូវការបណ្តុះបណ្តាលសម្រាប់បុគ្គលិកជនជាតិជប៉ុនផងដែរ ហើយយើងមានអារម្មណ៍ថាជំនាញរបស់បុគ្គលិកកើនឡើងលឿនគួរឲ្យកត់សំគាល់។

បុគ្គលិក2នាក់ដែលមានទិដ្ឋាការសមត្ថភាពជំនាញជាក់លាក់ បានទទួលចំណេះដឹងគ្រប់គ្រាន់ពីក្រុមហ៊ុនយើង ហើយពួកយើងក៏មានការជឿជាក់យ៉ាងខ្លាំងលើពួកគេដែរ។ នៅក្នុងការបណ្តុះបណ្តាលបុគ្គលិកជនជាតិជប៉ុនដែលបានចូលបម្រើការងារនៅឆ្នាំនេះ យើងក៏បានឱ្យពួកគេធ្វើជាគ្រូណែនាំបង្ហាត់ដែរ។ យើងបានចាត់ទុកពួកគេដូចជា "គ្រួសារ" រួចទៅហើយ ហើយទៅអនាគត មិនមែននៅត្រឹមបុគ្គលិកសមត្ថភាពជំនាញជាក់លាក់ទេ គឺយើងចង់ឲ្យពួកគេធ្វើការឲ្យបានរយៈពេលកាន់តែយូរ។

បុគ្គលិក5នាក់ដែលមានទិដ្ឋាការសមត្ថភាពជំនាញជាក់លាក់ កំពុងរស់នៅផ្ទះជួលដែលដើរប៉ុន្មាននាទីពីរោងចក្រដែលពួកគេធ្វើការ។ យើងក៏មានសិក្ខាកាមហ្វឹកហ្វឺនសមត្ថភាពជំនាញទាំងបុរសស្ត្រីរហូតដល់ 50 នាក់ ហេតុនេះក្រុមហ៊ុនយើងក៏បានសង់កន្លែងស្នាក់នៅបុគ្គលិកស្ត្រីថ្មីដែរ។ ផ្ទះជួលនៅឆ្ងាយពីផ្សារទំនើបជាដើមហើយនៅរដូវរងាគឺពិបាកក្នុងការដើរទៅទិញអីវ៉ាន់ ហេតុនេះនៅថ្ងៃអាទិត្យដែលរោងចក្រសម្រាក បើមានការស្នើសុំពីពួកគេ យើងនឹងជូនទៅមកដោយរថយន្តក្រុង។

អ្នកទទួលបន្ទុកកិច្ចការទូទៅនិងបុគ្គលិកបរទេសត្រូវបានភ្ជាប់ទំនាក់ទំនងគ្នាតាមបណ្តាញសង្គមដែលអាចទាក់ទងគ្នាដោយផ្ទាល់គ្រប់ពេល។ ព័ត៌មានដូចជាមិនស្រួលខ្លួនជាដើមគឺត្រូវបានបញ្ចូលទាន់សភាពការណ៍ ហេតុនេះវាផ្តល់គុណសម្បត្តិគឺអាចឆ្លើយតបបានយ៉ាងរលូន។ នៅពេលបានទទួលដំណឹងថា "បាត់សោរបន្ទប់" នៅម៉ោង8យប់ យើងមានអារម្មណ៍ថាវាល្អណាស់ដែលអាចទាក់ទងគ្នាបាន។

នៅក្រុងម៉ុនបិទ្ស៊ុ មានធនធានមនុស្សជាជនបរទេសប្រហែល 500 នាក់កំពុងរស់នៅ។ ហេតុនេះ មានប្រព័ន្ធជំនួយដែលនៅទូទាំងទីក្រុងដូចជាមជ្ឈមណ្ឌលប្រាស្រ័យទាក់ទងអន្តរជាតិ ថ្នាក់ភាសាជប៉ុន កម្មវិធីប្រកួតកីឡា កម្មវិធីទស្សនកិច្ចសង្គមជាដើម ហើយក្នុងនាមជាក្រុមហ៊ុន យើងក៏អរគុណយ៉ាងខ្លាំង។ យើងនឹងបន្តផ្សព្វផ្សាយចំណុចល្អរបស់ក្រុងម៉ុនបិទ្ស៊ុទៅកាន់ធនធានមនុស្សជាជនបរទេសហើយបង្កើតបរិស្ថានងាយស្រួលរស់នៅដែលអាចឲ្យពួកគេធ្វើការបានយូរអង្វែងខណៈពេលសហការជាមួយរដ្ឋបាល។